По дури 144 години градба, завршена е Кулата на Исус Христос – последната и најважна кула на ова монументално здание што го осмисли славниот архитект Антони Гауди (Antoni Gaudí).
Со висина од 172 метри и голем крст на врхот, новата кула стана највисоката точка на базиликата и круна на проектот кој со генерации привлекува милиони посетители од целиот свет.
Свечено отворање на архитектонскиот сон
Свеченото отворање беше обележано со посебна миса и благослов, со кои воедно се одбележаа и 100 години од смртта на Антони Гауди, човекот чија визија го обликуваше еден од најфасцинантните споменици на денешницата.
Иако многумина веруваат дека со завршувањето на последната кула градбата конечно е комплетирана, работите на Саграда Фамилија сè уште не се целосно завршени. Во наредните години, фокусот ќе биде насочен кон внатрешното уредување на базиликата, кое би требало да биде готово до 2028 година.
Посебно внимание ќе биде посветено и на величествената Фасада на славата (Façana de la Glòria), главниот влез во базиликата и последното големо дело од проектот на Гауди кое чека на својата реализација.
Крст што го осветлува хоризонтот на Барселона
Интересно е што монументалниот крст на врвот на кулата е произведен во Германија, а потоа е транспортиран во Шпанија во 14 однапред составени делови од бетон и нерѓосувачки челик. Потоа, секој сегмент внимателно беше подигнуван и монтиран на голема висина пред конечната инсталација.
Идејата на Гауди била крстот во текот на денот да ја рефлектира сончевата светлина, додека ноќе да го осветлува хоризонтот на Барселона. Токму затоа, новата кула нема да претставува само архитектонски детал, туку и нова визуелна точка на градот.
Финансирање од самите посетители: Уште една занимливост е фактот што Саграда Фамилија се финансира исклучиво од донации и приходи од влезници. Откако базиликата беше отворена за посетители во 2010 година, милиони туристи придонесоа за продолжување на градбата. Само во текот на 2025 година, ја посетиле речиси пет милиони луѓе.
Иако завршувањето на главната кула е огромен чекор кон остварувањето на визијата на Гауди, Саграда Фамилија продолжува да се развива. Токму затоа, оваа градба останува единствен пример за проект кој на фасцинантен начин ги поврзува минатото, сегашноста и иднината.
Повеќе од еден век откако беа поставени првите темели, Барселона го слави моментот кој ќе влезе во историјата – моментот кога едно од најголемите архитектонски ремек-дела на светот конечно го доби својот највпечатлив симбол.
Извор: easylife.rs
